Основното јавно обвинителство Скопје отвори кривична истрага за лицето кое преде два дена изврши разбојништво во сендвичара „Вили“, во центарот на Скопје, кога со употреба на сила и закана со пиштол нападнал двајца вработени во угостителскиот објект. Осомничениот, откако дошол во задниот дел на сендвичарата, се доближил до вработените и им се заканил со пиштол, барајќи од нив да му ги дадат парите од прометот. Една од оштетените успеала да влезе и да се заклучи во сендвичарата, по што осомничениот продолжил да и се заканува на втората оштетена. Тој ги одзел парите коишто вработената во тие моменти ги имала кај себе, но откако не успеал да ја отвори вратата на сендвичарата тој се оддалечил, а потоа испукал еден куршум по што се дал во бегство. Со наведените дејствијата осомничениот сторил кривичното дело разбојништво. Јавен обвинител за него, до судот, доставил и предлог за определување на мерката притвор, по сите три основи по коишто се изрекува оваа мерка.
