Латас и неговите браќа ослободени од вина за викендичките

од страна на
Љубиша Станковиќ
-
2407

Судот ги ослободи денеска од вина Драган Павловиќ Латас и неговите браќа Срѓан и Звездан, кои беа обвинети за бесправна градба во случајот „Тревник“ на СЈО.

Судијката Марија Клетничка Марковски, на изрекувањето на пресудата за „Тревник“, кажа дека делото за кое се обвинети не е кривично дело. Посочи дека тие се товарат оти од јули 2012 до 2013 година спротивно на закон граделе без одобрение во општина Зелениково на сопствено земјиште. Откако почнале со градба поднеле барање за издавање одобрение за изградба на викенд куќа до општината, прикривајќи дека градбата веќе е почната.

– Имајќи ги предвид сите изведени докази советот донесе одлука дека се ослободуваат од обвинение. Делото за кое се обвинуваат не е кривично дело. Трошоците паѓаат на товар на државата, изјави судијката Марковски.

Судот образложи дека според законот за градење, градежниот инспекторат е надлежен за контрола и инспекциски надзор, и доколку не се почитува законот предвидени се соодветни санкции за инвеститорот и изведувачот.
– Во конкретниот случај не постои ниту една претставка од граѓанин или институција дека постои безправна градба, што кажува дека немало интерес од јавноста. Дополнително градбата е запишана во катастар на недвижнини и притоа никој не го оспори тоа, изјави судијката.
Рече дека постапките за издавање на дозволата за градба и легализацијата на градбите биле испочитувани. Странките имаат право на жалба во рок од 15 дена. Судот ги укинува мерките за претпазливост за Срѓан и Звездан Павловиќ, кажа судијката Марковски.
Застапник на обвинението е специјалната јавна обвинителка Елизабета Јосифовска. Таа најави дека СЈО ќе се жали на првостепената одлука.
-Нема дилема дека ќе жалиме пред Апелациониот суд. За нас обвинението е издржано и основано, рече обвинителката Јосифовска.

Во судница пресудата ја слушнаа само Драган и Срѓан Павловиќ, додека нивниот брат обвинетиот Звездан не присуствуваше.

Спонзорирано